Հյուրանոցի հիմնական գործունեությունը հաճախորդներին ծառայություն մատուցելն է, որն էլ բաղկացած է հետևյալ փուլերից.

• Նախնական պատվեր՝ ամրագրում
• հաճախորդի ընդունում, գրանցում և տեղավորում
• սննդի և կեցության ծառայությունների մատուցում
• լրացուցիչ ծառայությունների մատուցում
• վերջնահաշվարկ և ճանապարհում

Հյուրանոցի վերոհիշյալ ծառայությունները դասվում են հիմնական ծառայությունների շարքին, և դրանցից յուրաքանչյուրն իրականացնում է սպասարկման կարևորագույն ֆունկցիա:

Ամրագրումը հյուրանոցային տեղերի նախնական պատվերն է: Այս գործընթացից էլ սկսվում է հաճախորդի սպասարկումը: Ամրագրման գործընթացով զբաղվում են ընդունման և տեղավորման ծառայության աշխատակիցները: Բացի ամրագրման պատվերների ընդունումից, այս ծառայությունը պետք է ինֆորմացված լինի հյուրանոցում առկա ազատ տեղերի մասին:

Հանրային միջոցառումների ժամանակ հյուրանոցային ծառայությունների նկատմամբ պահանջարկը մեծանում է: Հյուրանոցի համար ավելի ձեռնտու է ամրագրման պատվեր ընդունել խմբակային հաճախորդներից, քանի որ ամրագրման պատվերը խմբի կողմից տրվում է մինչև միջոցառումը սկսվելը: Այս դեպքում ամրագրումը չհաստատելու վտանգը շատ փոքր է: Հյուրանոցի զբաղված լինելը կախված է հանգստյան սեզոնից, տարածաշրջանի ակտիվությունից, տնտեսական և քաղաքական իրադրությունից: Հագեցած սեզոնների ժամանակ հյուրանոցը կարող է իրականացնել կրկնակի ամրագրում: Սա նշանակում է, որ միաժամանակ հյուրանոցի նույն համարը վաճառվում է երկու տարբեր մարդկանց: Ընտրելով նման ճանապարհ՝ հյուրանոցը մեծ ռիսկի է գնում, քանի որ երկու հաճախորդն էլ կարող են ժամանակին ժամանել հյուրանոց: Հնարավոր է, որ հաճախորդներից որևէ մեկը չեղյալ հայտարարի ամրագրումը կամ ուղղակի չգա, այս դեպքում հյուրանոցի ռիսկերը արդարացվում են: Իսկ եթե երկու հաճախորդն էլ ժամանում են, ապա համարը ստանում է նա, ով շուտ է եկել: Սակայն այս պարագայում էլ հյուրանոցը ունի հատուկ մշակած քաղաքականություն. հաճախորդին տեղավորում են մեկ այլ համագործակցող հյուրանոցում: Թե՛ հյուրանոցի, թե՛ հաճախորդի համար ցանկալի է, որ ամրագրումը կատարվի նախօրոք և որքան շուտ, այնքան՝ լավ:

Հաշվառման և տեղավորման ծառայության ծառայության հիմնական ֆունկցիան է տեղերի ամրագրումը, հաճախորդների գրանցումն ու տեղավորումը, վերջնահաշվարկի կազմումը, ինֆորմացիայի տրամադրումը: Հաշվառման և տեղավորման ծառայությունը յուրաքանչյուր հյուրանոցի սիրտն է: Շատ հյուրանոցներում ծառայությունը ստացել է Reception անունը: Այս ծառայության հետ հաճախորդն ավելի շատ է շփվում, դիմում է ինֆորմացիա և խորհրդատվություն ստանալու համար: Շվեցարից՝ դռնապանից հետո ընդունման ծառայության աշխատակիցն է դիմավորում հաճախորդին, և նրանց 5 րոպեանոց շփումը հաճախորդի մոտ ստեղծում է լիարժեք տպավորություն իր ընտրած հյուրանոցի մասին:

Հյուրանոցի հաշվառման և տեղավորման ծառայության հիմնական նպատակը համընկնում է հյուրանոցի հիմնական խնդրի հետ՝ հաճախորդներին տրամադրել բարձրակարգ սպասարկում և ապահովել հյուրանոցային ծառայությունների լիարժեք վաճառք: Այս ծառայության աշխատակիցները պետք է հաճախորդների հետ շփման ժամանակ լինեն մաքսիմալ կոռեկտ և ավարտին հասցնեն խոսքը՝ չընդհատելով այն կողմնակի հեռախոսային խոսակցությամբ: Ընդունման և տեղավորման ծառայությունը ընդունված է բաժանել Front Desk (ընդունման և տեղավորման գրանցասեղան,ադմինիստրատորի և պորտյեի գրանցասեղան, Reception) և Front Office: Ընդունման և տեղավորման գրանցասեղանի մոտ աշխատում են մենեջերը, ադմինիստրատորը և այլ ընդունման աշխատակիցներ: Ընդունման և տեղավորման ծառայության գրանցասեղանը բաժանվում է 3 մասի՝ գրանցման բաժին, դրամարկղային բաժին և ինֆորմացիայի և փոստի բաժին:

Հաշվառման և տեղավորման ծառայությանը ներկայացվում են հետևյալ պահանջները.

1. Ծառայությունը պետք է մոտ գտնվի հյուրանոցի մուտքին, եթե հյուրանոցի վեստիբյուլը մեծ է, ապա ծառայությունը կարող է տեղակայված լինել հենց այդ հատվածում: Գրանցասեղանը պետք է հաճախորդների համար հարմար լինի և համալրված լինի ինֆորմացիայի տրամադրման միջոցներով և ցուցումներով:

2. հաշվառման ծառայության գրանցասեղանը պետք է լինի մաքուր և հավաքված, այն պետք է ունենա հստակ ֆունկցիոնալ բաժանում. հաճախորդին տրվող ինֆորմացիան չպետք է խառնվի աշխատակիցների համար անհրաժեշտ ինֆորմացիային: Տեխնիկական միջոցները և աշխատանքի համար անհրաժեշտ փաստաթղթերը չպետք է լինեն շատ տեսանելի կամ թափթփված:

3. հաշվառման և տեղավորման ծառայության աշխատակիցները պետք է լինեն կոկիկ հագնված, ունենա անթերի մաքուր տեսք: Աշխատակիցները պետք է լինեն շատ բարեհամբույր, պատրաստ օգնելու հաճախորդին և իրականացնելու նրա բոլոր ցանկությունները: Հաճախորդի հետ պետք է խոսել կանգնած և որ ամենակարևորն է, չպետք է հաճախորդին սպասեցնել: Մինչ հաճախորդի ժամանելը, հաշվառման և տեղավորման ծառայությունը ստանում է ամրագրման պատվեր և ըստ այդմ էլ բաշխում համարները: Հյուրանոցի աշխատանքը շուրջօրյա է, այդ պատճառով հաշվառման և տեղավորման ծառայությունը աշխատում է ըստ գրաֆիկի:

Ծառայության ամենակարևոր ֆունկցիան է՝ պահպանել բնակելի տարածքների սանիտարահիգիենիկ նորմերը: Ծառայությունը ղեկավարում է համարային ֆոնդի տնօրենը, նրան ենթարկվում են սպասուհիները, հարկի հերթապահները, սուպերվայզերները և այլ աշխատակիցներ:

Սպասուհու ամենակարևոր պարտականություններից է համարի մաքրության պահպանումը՝ անկախ նրա զբաղված կամ ազատ լինելուց: Հյուրանոցի կարգից կախված՝ յուրաքանչյուր սպասուհի մաքրում է 16-20 համար:

Բնակելի համարի մաքրումը հյուրանոցի մաքրման աշխատանքների անբաժան մասն է կազմում: Մաքրման աշխատանքներին անցնելիս սպասուհին պետք է հագնի մաքուր և արդուկված համազգեստ: Պետք է ստուգի մաքրման պարագաները, մաքրման նյութերի և տեխնիկայի առկայությունը և դրանից հետո հարկի հերթապահից վերցնի համարի բանալին: Մաքրման աշխատանքները սպասուհին սկսում է արդեն ամրագրված համարներից, քանի որ յուրաքանչյուր րոպե հյուրը կարող է ժամանել: Եթե այդ համարները երեկոյան և գիշերային հերթափոխի ընթացքում արդեն մաքրվել են, ապա սպասուհին պետք է ուղղակի մաքրի փոշին և ստուգի սանհանգույցի մաքրությունը: Դրանից հետո սպասուհին սկսում է մաքրել այն համարները, որոնք նոր են ազատվել, իսկ ամենավերջում անցնում է բնակեցված համարների ամենօրյա մաքրման աշխատանքներին այն դեպքում, եթե հյուրը սենյակում չէ, դուրս է եկել: Սակայն կարող են լինել դեպքեր, երբ համարում հիվանդ կա, ով չի կարող տեղաշարժվել կամ համարում ապրում է մեծ ընտանիք, որի անդամներից ոմանք միշտ սենյակում են, ապա սպասուհին ստիպված է հյուրերի ներկայությամբ մաքրել համարը՝ հաշվի առնելով վերջիններիս համար հարմար ժամանակը:

Զարգացած հյուրանոցային կառույցներում դռների վրա կարելի է հանդիպել հատուկ ցուցանակներ, օրինակ՝ «կարելի է մաքրել» կամ «չանհանգստացնել», որոնք կախվում են դռան դրսի կողմում: Սենյակը մաքրելուց սպասուհին չպետք է դուռը ներսից փակի: Մաքրման ժամանակ պետք է պարտադիր օդափոխի սենյակը, դուրս գալուց փակի բանալիով: Եթե սենյակի տարբեր մասերում դրված են հյուրի անձնական իրերը, ապա նա մաքրելուց հետո դրանք պետք է դնի նույն տեղերում: Մաքրված կոշիկները կարելի է դնել մուտքի մոտ տեղակայված կախիչ-պահարանում, իսկ գիշերանոցներն ու գիշերային հագուստը անկողինը հարդարելիս կարելի է դնել բարձի տակ: Եթե հյուրը անփութորեն իր ճամպրուկից իր է կիսով չափ հանել, ապա սպասուհին իրավունք չունի այն տեղը մտցնել: Մի շարք հյուրանոցներում կարող է նախատեսված լինել սուպերվայզերի հաստիքը, որը հսկողություն է իրականացնում սպասուհիների աշխատանքի և հերթափոխի վրա: Բարձրակարգ հյուրանոցներում այս ծառայության աշխատակիցներից է ստյուարդը: Վերջինս իր աշխատանքը սկսում է օրվա երկրորդ կեսից, թարմացնում է համարի սրբիչները, թարմ ծաղիկներ է դնում ծաղկամանի մեջ և հետևում է սպասարկման ստանդարտների պահպանությանը:

Հյուրանոցի անվտանգության ծառայությունը ստեղծված է հաճախորդների անվտանգությունը ապահովելու և հյուրանոցը ամեն տեսակի վտանգներից պաշտպանելու համար: Հյուրանոցի և հաճախորդների սեփականությանը սպառնացող վտանգներից է գողությունը: Անվտանգության ծառայության գերխնդիրը ոչ թե հանցագործության բացահայտումն է, այլև դրա կանխարգելումը: Պետք է հաշվի առնել, որ անվտանգության աշխատակիցները չունեն այն իրավասությունները, ինչպիսիք ունեն ոստիկանության աշխատակիցները. նրանք իրավունք չունեն հարցաքննելու, հետախուզելու և նմանատիպ գործողություններ իրականացնելու:

Անվտանգության ծառայության հաջող աշխատանքի համար կարևոր է այլ ծառայությունների հետ ունեցած կապի ամրապնդումը: Հյուրանոցի անվտանգությունը ապահովելու համար ծառայությունը մշակում է հյուրանոցի անվտանգության պահպանման սխեմա, որը նախապես համաձայնեցվում է տնօրենի հետ:

Ծառայության աշխատակիցների թիվը մեծ չէ. 500 տեղանոց հյուրանոցում նախատեսվում է 10 անվտանգության աշխատակից: Ցանկալի է, որ աշխատակիցների մեջ լինեն կանայք, քանի որ կին-տուժողին կարող է օգնել միայն կին-անվտանգության աշխատակիցը: Անվտանգության ծառայության աշխատակիցը պետք է լինի հանգիստ, հավասարակշռված անձնավարություն: Ծառայության աշխատանքը հերթափոխային է, սակայն այն չպետք է համընկնի այլ ծառայությունների հերթափոխի հետ, քանի որ հիմնականում այդ ընթացքում են տեղի ունենում անկարգություններ: Ծառայությունը պետք է ունենա իր համար առանձնացված և կահավորված տարածք, այն չպետք է աչքի ընկնի: Սենյակը պետք է համալրված լինի անվտանգությունը ապահովող տեխնիկական սարքավորումներով` հեռուստացույց, համակարգիչ, տեսախցիկներ, անվտանգության լուսային և ձայնային համակարգ:

Հյուրանոցի օրը պետք է տեսագրվի 24 ժամ շարունակ: Ծառայությունը պատասխանատու է նաև կողպեքների և չհրկիզվող պահարանների համար: Ծառայության աշխատակցին խստիվ արգելվում է կրել այնպիսի ծառայողական համազգեստ, որը կարող է ազդել հաճախորդների տրամադրության վրա, տեսանելի մասում պետք է կախել ատրճանակը: Կրծքին ամրացված անվանանշանը և ծառայության անունը բավական է: Այնպիսի հանցագործություններ, ինչպիսիք են սպանությունը, զինված հարձակումները, հետաքննում են իրավապահ մարմինները, որոնք անմիջապես տեղեկացվում են դրա մասին: Նման իրավիճակների ժամանակ պետք է աշխատել, որ այդ ծառայությունների իրականացրած աշխատանքները հյուրանոցի հաճախորդներին չանհանգստացնեն:

Վերջին ժամանակներում ավելի արդի են դարձել զինված ահաբեկչությունները տարբեր խմբավորումների կողմից, ուստի հյուրանոցի անվտանգության ծառայությունը պարտավոր է նախապատրաստել հյուրանոցի աշխատակիցներին նման իրավիճակների համար և մշակել հատուկ վարքագիծ: Այսպիսով, հյուրանոցի անվտանգության ծառայությունը իրականացնում է հետևյալ ֆունկցիաները.

● Ապահովում է հյուրանոց այցելած հաճախորդների անձնական և նյութական անվտանգությունը

● պահպանում է հյուրանոցի սեփականության անվտանգությունը

● հյուրանոցը պաշտպանում է ահաբեկչական հարձակումներից, հանրային անկարգություններից

● պահպանում է կարգ ու կանոն հյուրանոցի բոլոր հատվածներում

● ապահովում է հաճախորդների հանգստությունը

● իրականացնում է արագ և էֆեկտիվ տարհանում

Հյուրանոցային համալիրների նյութատեխնիկական բազան ներառում է հյուրանոցի շենքը, հարակից շինությունները, տեխնիկական սարքավորումները, տրանսպորտային միջոցները և այլն: Հիմնական նյութատեխնիկական բազայի մեջ են մտնում նաև աշխատանքային պարագաները, տնտեսական պարագաները, տարբեր նշանակության կահույքը, այսինքն՝ հյուրանոցի շարժական և անշարժ սեփականությունը: Ըստ ծառայությունների՝ կարելի է տարանջատել հյուրանոցի սեփականությունն հանդիսացող նյութատեխնիկական բազան.

● Ընդունման, գրանցման և տեղավորման ծառայությունը տեղակայված է հյուրանոցի նախասրահում, դա ադմինիստրատիվ կետն է: Այս տարածքի նյութատեխնիկական բազայի մեջ են մտնում ընդունարանի գույքը (գրանցասեղան, աթոռներ, պահարան, բանալիների պահարան և այլն), տեխնիկական սարքավորումները (համակարգիչ, հեռախոս, ֆաքս, տպիչ և այլն), տնտեսական ապրանքները: Ամրագրման ծառայությունը հանդիսանում է ընդունման, գրանցման և տեղավորման ծառայության բաղկացուցիչ մասը՝ ունենալով վերոհիշյալի նյութատեխնիկական բազան:

● Սպասարկման ծառայությունը հյուրանոցի ամենակարևոր ծառայությունն է, որտեղ աշխատում է հյուրանոցի աշխատողների մեծ մասը: Նյութատեխնիկական բազան բազմազան է՝ սկսած տեխնիկական սպասարկման սարքավորումներից (վերելակներ, լուսավորություն, աշխատանքային պարագաներ կահույք և այլն):

● Սննդի սպասարկման ծառայությունը հյուրանոցում կարևոր ծառայություններից մեկն է: Ինչպես գիտենք, առանց սննդի սպասարկում չկա: Այս ծառայության աշխատանքը ամենապատասխանատու և ամենապարտավորեցնող ծառայություններից մեկն է, և քանի որ խոսքը սննդի մասին է, ապա պետք է խստորեն պահպանվեն սննդի մատուցման և պատրաստման սանիտարահիգիենիկ նորմերը։ Սննդի պատրաստման տարածքը հյուրանոցի խոհանոցն է ՝ աշխատանքը հեշտացնող տեխնիկական սարքավորումներով (գազօջախ, սալօջախ, միկրոալիքային վառարան, սառնարան, կարտոֆիլ մաքրելու, միս կտրատելու սարքեր,
մսաղաց, հյութաքամիչ, սեղանի սպասք և այլն):

● Համարային ֆոնդի սպասարկման ծառայությունը հյուրանոցի ամենամեծ ծառայությունն է: Համարային ֆոնդի սպասարկման ծառայության
նյութատեխնիկական բազան ներառում է հյուրանոցի բնակելի
տարածքի կահույքը, տեխնիկական սարքավորումները (համարի կահույքը՝ մահճակալ, զգեստապահարան, բազմոց, հեռուստացույց, գրասենյակային սեղան, լոգարանային պարագաներ և մաքրման համար անհրաժեշտ նյութեր):

● Անվտանգության ծառայությունը հյուրանոցի խաղաղ առօրյայի գրավականն է։ Ծառայության աշխատակիցների վրա դրված է մեծ պատասխանատվություն՝ ապահովելու թե´ աշխատակիցների, թե´ հաճախորդների անվտանգությունը: Ծառայությունը տեղակայված է հիմնականում հյուրանոցին հարակից շենքում, նյութատեխնիկական բազան շատ հարուստ չէ: Հիմնականում աշխատանքի համար անհրաժեշտ առաջին պարագաներն են՝ սեղան, աթոռ, համակարգիչ, տեսախցիկներ, մոնիտորներ, աշխատակիցների համար հատուկ պաշտպանիչ հանդերձանք:

Աստղերը հյուրանոցների դասակարգման ամենահայտնի միջոցն են: Այս համակարգի մեջ մտնում են Եվրոպայի շատ երկրներ` Ավստրիան, Բելգիան, Չեխիան, Դանիան, Գերմանիան, Էստոնիան, Հունաստանը, Հունգարիան, Լատվիան, Լյուքսեմբուրգը, Մալթան, Նիդեռլանդները, Շվեդիան, Շվեյցարիան, և այլ երկրներ։

Դասակարգումն իրականացվում է՝ ըստ հետևյալ չափանիշների.

Մեկ աստղանի հյուրանոց

Մեկ աստղանի հյուրանոցն ունի գիշերելու հնարավորություն։ Այս հյուրանոցների բոլոր համարները նույն տեսակի են, ծառայությունների քանակը մինիմալ է և չի իրականացվում ամենօրյա մաքրում: Համարում մահճակալ, աթոռ, հայելի, պահարան և օճառ կա: Առանձին լողասենյակը միշտ չէ հասանելի: Հեռուստացույցն ու հեռախոսն ընդհանուր սրահում են գտնվում:

Երկու աստղանի հյուրանոց

Երկու աստղանի հյուրանոցներում առկա է համարների 1-2 տեսակ, ինչպես նաև` մինիմալ քանակությամբ ծառայություններ. ամենօրյա մաքրում և առանձին լողասենյակ համարում: Այստեղ կարելի է գտնել այն ամենը, ինչը մեկ աստղանի հյուրանոցներում, ինչպես նաև` բար, վերելակ և նախաճաշ:

Երեք աստղանի հյուրանոց

Այս տիպի հյուրանոցներում հասանելի է մի քանի տեսակի համար, ստանդարտ ծառայություններ` ամենօրյա մաքրում, առանձին լողասենյակ, հեռուստացույց, մինի-բար կամ սառնարան: Տարածքում հասանելի է նաև լողավազան, մարզասրահ, ռեստորաններ, զվարճանքի կենտրոններ և փոխանակման կետ:

Չորս աստղանի հյուրանոց

Չորս աստղանի` բարձր դասի հյուրանոցներում ներառված են բոլոր ստանդարտ ծառայությունները. համարի մաքրում օրական երկու անգամ, ինչպես նաև` հատուկ ծառայություններ (սպա-մերսում, մի քանի բար և ռեստորաններ): Համարում առկա է հեռախոս, մինի-բար, գանձապահարան, մազերի չորացուցիչ, խալաթներ, կոսմետիկ պարագաներ, օրթոպեդիկ ներքնակներ։

Հինգ աստղանի հյուրանոց

Հինգ աստղանի հյուրանոցներն առաջարկում են ծառայությունների լայն տեսականի, ներառյալ էքսկլյուզիվ ծառայություններ (գոլֆ ակումբ, ուղղաթիռի հարթակ, աղախիններով առանձնատներ): Հյուրանոցներում իրականացվում է ուղեբեռի առաքում, առկա է դռնապան, լողավազան, արբանյակային հեռուստատեսություն, ֆիթնես ակումբներ, սպա-սրահներ, մանկական ճամբարներ և այլ էլիտար ծառայություններ:

Նշվում է, որ աշխարհի ոչ բոլոր երկրներն են օգտվում հյուրանոցների գնահատման այս համակարգից. աստղերից բացի, որոշ հյուրանոցներ ունեն ադամանդներ (ԱՄՆ, Կանադա), թագեր (Մեծ Բրիտանիա), տառեր (Հունաստան) և բալեր (Հնդկաստան):

Տեղավորման ծառայությունը, սննդի և այլ ծառայություններ, որոնք մտնում են հյուրանոցում մատուցված ծառայությունների ցանկի մեջ, լրացնում են իրար, մեկ ընդհանրություն են կազմում և բավարարում են հյուրի պահանջները: Հաշվի առնելով, թե դրանք ինչպես են ձևավորված և համակարգված մեկ ամբողջության մեջ՝ առանձնացնում են հյուրանոցային համալիրների հետևյալ դասակարգումները.

1. Հյուրանոց «Отель»

Այս հյուրանոցը տեղավորման և ժամանակավոր կացարանի ավանդական ձևն է: Որպես օրենք, այն գտնվում է մեծ քաղաքում, ունի բազմաթիվ աշխատակիցներ, լրացուցիչ ծառայությունների մի ամբողջ համակարգ և հարմարավետություն:

2. Հյուրանոց «Լյուքս»

Փոքր կամ միջին ծավալ ունեցող հյուրանոցային համալիր է, տեղակայված է քաղաքի կենտրոնական մասում: Բանիմաց անձնակազմը կարող է բավարարել նույնիսկ ամենաքմահաճ այցելուի ցանկությունները: Տարբերակվող հատկանիշներից է համարի բարձր գինը, որի մեջ մտնում են բարձրակարգ և պատշաճ ծառայությունները: Բացի այդ համարներն ունեն մի քանի սենյակ, հյուրասենյակ և առանձին ննջարան: Չի բացառվում նաև խոհանոցով համարի առկայությունը:

3. Հյուրանոց միջին կարգի (Гостиница)

Այս կառույցն ավելի մեծ է, քան հյուրանոց «Լյուքսը» ՝ մոտավորապես 400-2000 տեղ: Տեղակայված է քաղաքի կենտրոնում: Առաջարկում է ծառայությունների բավականին լայն ընտրություն, իսկ գները համապատասխանում են տվյալ տարածաշրջանի պահանջարկին: Նախատեսված է գործարարների, ինդիվիդուալ տուրիստների, խորհրդակցությունների մասնակիցների ընդունելության համար։

4. Ապարտ հյուրանոց

Ոչ մեծ չափերի հյուրանոց է՝ մոտավորապես չորս հարյուր տեղանոց: Ոչ կանոնավոր թիվ ունեցող քաղաքային ոլորտի համար շատ հարմար է: Տրամադրում է բնակարանային տիպի համարներ և հաճախ գործում է ինքնասպասարկման ծառայությունը: Համարների և ծառայությունների գինը ցածր է և կախված է վարձակալման ժամանակահատվածից: Սպասարկում է ընտանեկան տուրիստական խմբերի և գործարարների, որոնք ավելի հանգիստ միջավայր են նախընտրում։

5. Էկոնոմ կարգի հյուրանոց

Միջին և փոքր ծավալի հյուրանոց է՝ մոտավորապես հարյուր հիսուն տեղանոց: Գտնվում է մայրուղիներին մոտ, նախատեսված է զբաղված մարդկանց, գործարարների և ինդիվիդուալ տուրիստների համար։

6. Հյուրանոց-կուրորտ

Այս կառույցը ներառում է հյուրընկալության բոլոր ծառայությունները, բացի դրանից առաջարկում է համապատասխան բժշկական ծառայություններ և դիետիկ կերակրացանկ: Հիմնականում տեղակայված է կուրորտային տեղանքում։

7. Մասնավոր հյուրանոց «Գիշեր և նախաճաշ»

Այս տեսակը շատ տարածված է ԱՄՆ-ում: Այս հյուրանոցը փոքր, երբեմն միջին տարողություն ունի և գտնվում է քաղաքի արվարձաններում կամ գյուղական տարածքներում: Սպասարկման մեջ մտնում է նախաճաշը և թեթև ընթրիքը ընտանեկան մթնոլորտում: Հաճախորդները առևտրականներ են և երթուղային տուրիստներ, որոնք նախընտրում են ընտանեկան հարմարավետություն։

8. Առողջարան

Կազմակերպությունն ունի սեղմ սպասարկում: Այստեղ նախաճաշը, ճաշն ու ընթրիքը մատուցվում են միայն մշտական հաճախորդներին: Ավանդական առողջարանը քիչ թվով համարներ ունի։

9. Մոթել

Մոթելը նախատեսված է ավտոտուրիստների և ընտանեկան խմբերի համար: Ինչպես հյուրանոցներում, այնպես էլ մոթելներում, համարի գնի մեջ չեն մտնում մատուցվող ծառայությունները. դրանք առանձին վճար են պահանջում: Հիմնականում սրանք մեկ կամ երկհարկանի շինություններ են՝ քաղաքից դուրս, գլխավոր ճանապարհներին մոտ: Փոքր տարողունակություն ունեցող շենքեր են՝ մոտավորապես չորս հարյուր տեղանոց: Սպասարկումը միջին կարգի է, ծառայությունները քիչ են: Հյուրանոցների հետ համեմատած՝ ծառայությունները սեղմ են, իսկ գները՝ ցածր: Հաճախ մոթելի կառույցի մեջ մտնում են ռեստորան, բար, կինոսրահ, խաղասրահ, լողավազան և այլն: Հաճախորդները շատ տարբեր են, բայց հիմնականում ավտոտուրիստներ են։

10. Ռոտել

Շարժական հյուրանոց է, ներկայացնում է մեկ կամ երկու սենյականոց շարժական տնակներ (վագոն), որոնցում կան բազկաթոռներ` քնելու համար: Կա նաև ընդհանուր հանդերձարան, խոհանոց, սառնարան և սանհանգույց։

11. Ֆլոտել

Խոշոր, լողացող հյուրանոց է, գտնվում է ջրի վրա: Տուրիստներին տրամադրվում են հարմարավետ համարներ, ակտիվ հանգստի միջոցներ՝ լողավազան, ստորջրյա լողի պարագաներ և այլն։

12. Ֆլայտել

Այս հյուրանոցը կոչվում է նաև «օդային հյուրանոց», այն շատ թանկ է և ոչ հաճախ է հանդիպում:

13. Բոտել

Այս հյուրանոցը տեղակայված է ջրի վրա, բայց չի լողում:

14. Ակվատել

Սովորական նավ է, որը օգտագործվում է և՛ որպես փոխադրամիջոց, և’ որպես հյուրանոց:

Բացի հյուրանոցների և զբոսաշրջային համալիրների ավանդական դասակարգումից, վերջիններս տարբերվում են իրենց մատուցած սպեցիֆիկ ծառայություններով: Այդ հաստատությունները մասնագիտացված են որևէ ոլորտում և հենց դրանով էլ ճանաչված են:

Կուրորտային հյուրանոց

Resort հյուրանոցը կամ կուրորտային հյուրանոցը մեծ պահանջարկ է վայելում խմբակային տուրիզմի սիրահարների շրջանում, մատուցում է բազմազան ծառայություններ հենց հյուրանոցի տարածքում: Այդ ծառայություններից են ֆիտնես ակումբի, թենիսի կորտերի, սպա-կենտրոնի, լողավազանի ծառայությունները: Resort– հյուրանոցը փակ, կողմնակի հայացքներից մեկուսացված տարածք է, որտեղ մարդիկ, կտրվելով շրջապատող աշխարհից, կարող են լիարժեք հանգստանալ և օգտվել կուրորտ հյուրանոցի մասնագիտացված ծառայություններից:

Լեռնադահուկային հյուրանոցներ

Մեր ժամանակներում լեռնադահուկային կուրորտներում հանգստանալը տուրիզմի շատ պահանջված ձև է, այդ պատճառով զարմանալի չէ, որ առաջացել է հյուրանոցի նոր տեսակ` լեռնադահուկային հյուրանոց: Վերջիններս կարող են լինել սովորական հյուրանոցներ կամ գերաններից պատրաստված ոչ բարձրահարկ կառույցներ: Նման կառույցներ հանդիպում են Ալպերում, որոնց նմանները այժմ կառուցվում են ԱՄՆ-ում և Ռուսաստանում: Հիմնական հանգստացողները ձմեռային սպորտաձևերի սիրահարներն են: Հյուրանոցը տրամադրում է տարատեսակ ծառայություններ, ապահովում հանգստացողների անվտանգությունը և տրամադրում սպորտային պարագաներ:

Բիզնես-հյուրանոց

Բիզնես-հյուրանոցներն ունեն իրենց հատուկ հաճախորդները, ինչը հենց անունից էլ պարզ է դառնում: Հյուրանոցի սպասարկման հիմնական նպատակն է ճամփորդող գործարարի համար ստեղծել գրասենյակային պայմաններ` հեռու իր գրասենյակից: Այդ պատճառով էլ համարը կահավորված է բոլոր անհրաժեշտ տեխնիկական սարքավորումներով, հնարավոր է վարձել խորհրդակցությունների դահլիճը և այն ամենը, ինչը կօգնի հեշտացնել գործարարի աշխատանքային գործունեությունը: Բիզնես-հյուրանոցները հիմնականում տեղակայված են քաղաքի կենտրոնական մասերում և մարդաշատ կենտրոններում:

Բուտիկ-հյուրանոց

Բուտիկ-հյուրանոցները սովորական հյուրանոցներից տարբերվում են նրանով, որ դրանք ունեն յուրահատուկ դիզայն` հատուկ թեմատիկայով: Այս հյուրանոցները աչքի են ընկնում իրենց հարմարավետությամբ և բարձր գներով: «Բուտիկ-հյուրանոց» տերմինը առաջացել է անցած դարի 90-ական թվականներին ԱՄՆ-ում և բնութագրվել է յուրահատուկ ինտերիերի և էքստերիերի դիզայնով:

Սպա-հյուրանոցներ

Սպա-հյուրանոցները ստեղծված են գեղեցիկ և առողջ հանգիստ ապահովելու համար: Այստեղ հնարավոր է օգտվել առողջարարական և երիտասարդացնող հատուկ սպա-ծառայություններից: Երբեմն այս հյուրանոցները անվանում են wellness-հյուրանոցներ: Որպես կանոն, բացի առողջացնող և երիտասարդացնող սպա-ծառայություններից, ունի բարեկարգ և հարմարավետ համարներ: Այս հյուրանոցները չի կարելի դասել էկոնոմ կարգի հյուրանոցների շարքին:

Հյուրանոցի սպասարկման տարածքների մեջ են մտնում խոհանոցը, վարսավիրանոցը, լվացքատունը, քիմմաքրումը, հագուստի և կոշիկի նորոգման և արդուկի սենյակները, վարձույթի սրահները և սպորտային նշանակության տարածքները, ֆոտոլաբորատորիաները և այլն: Այս տարածքների առկայությունը և մակերեսները կախված են հյուրանոցի նախագծումից, որի ժամանակ հաշվի է առնվում վերջիններիս լինելու կամ չլինելու փաստը` կախված հյուրանոցի կարգից և պահանջարկից: Երբեմն հյուրանոցի սպասարկման տարածքները ծառայություններ են մատուցում նաև քաղաքի բնակիչներին` լրացուցիչ եկամուտ ակնկալելով:

Սպասարկման տարածքները նախատեսված են հյուրերի համար, սակայն եկամուտ ստանալու և այցելուներ գրավելու համար այդ ծառայությունները հասու են դառնում նաև քաղաքի բնակիչներին: Հիսունից ավելի տեղ (խոշոր հյուրանոցներում) նախատեսված է վարսավիրանոցների համար՝ թե՛ տղամարդու, թե՛ կանացի: Բարձրակարգ հյուրանոցներում կան նաև կոսմետիկ ծառայություններ՝ դիմաբուժություն, դիմահարդարում: Վարսավիրանոցները և կոսմետիկ սենյակները տեղակայված են լինում հյուրանոցի հասարակական վայրերում: Պրակտիկան ցույց է տվել, որ հյուրանոցային վարսավիրանոցների աշխատակիցները ցերեկային ժամերին շատ ծանրաբեռնված չեն, եթե իհարկե սպասարկում են միայն հյուրանոցի հաճախորդներին: Այդ պատճառով նրանք կարող են սպասարկել նաև ոչ հյուրանոցային բնակիչներին:

Դա է պատճառը, որ այդ տարածքները անմիջական կապ ունեն վեստիբյուլի հետ: Երբեմն վարսավիրանոցները կարող են տեղակայված լինել երկրորդ հարկում, եթե վեստիբյուլի տարածքը շարունակվում է նաև այդ հարկում: Քիմմաքրումը, ֆոտոսրահները և այլ ծառայություններ նախատեսված են հյուրանոցի բնակիչների համար: Ցանկալի է, որ այս ծառայությունները տեղակայված լինեն հյուրանոցի մի հատվածում ամբողջական տեսքով: Հյուրանոցում բուժկետը նախատեսված է աշխատողներին և հյուրերին առաջին բուժօգնություն ցույց տալու համար: Սակայն շատ հյուրանոցներում հատուկ բուժկետի համար տարածք նախատեսված չի լինում։ Վերջիններս կարող են գտնվել կամ բնակելի հարկերում, կամ էլ բնակելի ու ծառայողական հարկերի միջև: Լրացուցիչ ծառայություններ մատուցելու ոլորտում մասնագիտացված տարածքներից են սպորտաառողջարանային և ժամանցի կազմակերպման տարածքները։

Advertisement

Յուրաքանչյուր ծառայություն ունի իր տարածքը. դրանց մեջ մտնում են
խորհրդակցությունների դահլիճը, պարասրահները, դիսկոտեկները, գրադարանները, բիլիարդի սրահները, խաղասրահները և այլն: Այս տարածքների առկայությունը կապված է նաև հյուրանոցի կարգի և հարմարավետության հետ:
Փորձը ցույց է տալիս, որ հյուրանոցային կառույցների տարածքը ճարտապետորեն չծանրաբեռնելու համար, կարելի է ունենալ մեկ մեծ սրահ, որը կծառայի և՛ որպես պարասրահ, և՛ խորհրդակցությունների դահլիճ: Այդպիսի սրահներում հարմար է օգտագործել շարժական պատեր, հավաքովի և հարմար կահույք, որի պահեստավորման համար նախատեսված է նաև մեկ այլ
լրացուցիչ տարածք: Երբեմն այդ սրահներում կարող է լինել կինոէկրան, իսկ միջազգային կոնֆերանսների ժամանակ նաև տեխնիկա՝ սինխրոն թարգմանության համար մի քանի լեզուներով։

Բացի դրանից կարևոր է, որ նման տարածքները տեղակայված լինեն սննդի սպասարկման կետերին մոտ, որպեսզի ըմպելիքի, սուրճի և թեթև ուտելիքի մատուցումը հեշտ լինի: Որպեսզի կինոթատրոնի, խորհրդակցության դահլիճի աղմուկը հանգստացողներին չխանգարի, դրանց համար նախատեսված է առանձին մուտք: Խորհրդակցությունների և կոնֆերանսների դահլիճը համալրված է լինում նստարաններով և սեղաններով: Այս տարածքի մեծությունը կախված է տեխնիկայի չափսերից։ Լողավազանները հիմնականում շատ տարածված են ծովափնյա հյուրանոցներում և հանգստյան տարածքներում: Փակ լողավազանները կառուցվում են առաջին հարկում կամ լրացուցիչ շինությունում, որը հյուրանոցին կապված է փակ միջանցքով: Բաց լողավազանները կառուցում են տարբեր ձևերով՝ ուղղանկյան կամ քառակուսու տեսքով: Լողավազանի խորությունը կախված է նրա նշանակությունից։

Հյուրանոցների որակավորման ամենաընդունված և տարածված ձևը եվրոպականն է կամ աստղային համակարգը, որն օգտագործվում է Ֆրանսիայում, Ավստրիայում, Հունգարիայում, Եգիպտոսում, Չինաստանում, Ռուսաստանում և մի շարք այլ երկրներում, որոնք իրենց հյուրընկալության ոլորտի վարկանիշով մուտք են գործել համաշխարհային հյուրանոցային ցանց: Որակավորմանը համապատասխան հյուրանոցները բաժանվում են կարգերի: Հյուրանոցների բարձր որակավորումը պայմանավորված է դրանցում որակյալ և ընդարձակ համարների առկայությամբ և բարձրակարգ սպասարկմամբ: Հինգ և չորսաստղանի հյուրանոցները իրարից տարբերվում են մանրուքներով: Սակայն լինում են դեպքեր, երբ չորսաստղանի հյուրանոցն ավելի հարգի է, քան հինգաստղանին (օրինակ՝ չորսաստղանիում լողավազանն ավելի լավն է, քան հինգաստղանիում):

Եգիպտոսում, ի տարբերություն այլ երկրների, աստղային բարձր կարգերը մեկաստղանին և երկաստղանին են: Իսկ Չինաստանում, բացի եվրոպական որակավորումից, կա նաև սեփական որակավորման «դպրոց», ուր ամենապարզունակ հանգստյան բազան, այսպես կոչված, «հյուրերի տունն է» (zhoodousuo), որոնք նման են հանրակացարանների: Սրանք երկու և երեքաստղանի հյուրանոցներ են համարվում, իսկ չորս և հինգաստղանի հյուրանոցները կոչվում են «գինետուն» (jindian): Չնայած դրան` չինական ստանդարտները ոչնչով չեն զիջում եվրոպականին, ուղղակի այստեղ ամեն ինչ ձևավորված և պատրաստված է ըստ ազգային նկարագրի՝ հագուստ, սենյակ , ուտելիք: Հունաստանում հյուրանոցների դասակարգման համար ընդունված է տառային սիստեմը. բոլոր հունական հյուրանոցները բաժանվում են չորս կարգի՝ A,B,C,D:

A կարգի հյուրանոցը համարվում է 4 *, B- ն ՝ 3*, C-ն՝ 2*, D-ն՝ 1*: Բարձրակարգ հյուրանոցներին երբեմն շնորհում են «De luxe» անունը: Սակայն Հունաստանում նույն կարգերին պատկանող հյուրանոցները իրարից խիստ տարբերվում են: Բրիտանական հյուրանոցների որակավորումը մի փոքր բարդ է: Ճիշտ է, կան հյուրանոցներ, որոնք պատկանում են ավանդական աստղային կարգերին, բայց հիմնականում որակավորման ցուցիչը թագն է, այսինքն հյուրանոցների դիմային մասում առկա է ոչ թե աստղ, այլ թագ: Որպեսզի թագային սիստեմից անցնեն աստղայինի, ապա թագերի թվից հանում են մեկը: Այսինքն հինգ թագը չորս աստղն է: Օրինակ՝ լոնդոնյան «Royal narfolk hotel»-ը կարելի է համարել երեքաստղանի կամ չորսթագանի հյուրանոց: Բացի աստղային և թագային դասակարգումից` Մեծ Բրիտանիայում գործում է հյուրանոցների որակավորման «Բրիտանական տուրիստական գործակալների» ընկերության՝ British Travel Avthiritey առաջարկը.

● Բյուջետային հյուրանոցներ- մեկաստղանի, որոնք տեղակայված են քաղաքի կենտրոնում, ունեն մինիմալ հարմարությունները։

● ցածր կարգի հյուրանոց- երկու աստղ

● միջին կարգի հյուրանոց- երեք աստղ

● առաջին կարգի հյուրանոց- չորս աստղ

● բարձր կարգի հյուրանոց- հինգ աստղ

Իտալիայում, Իսրայելում և Իսպանիայում չկան աստղային և թագային
սիստեմները: Գործում է կարգային սիստեմը: Իտալական հյուրանոցների որակավորումը չափազանց խճճված է:
Չնայած զբոսաշրջիկները շատ հաճախ հյուրանոցների դիմային մասում տեսնում են ծանոթ աստղերը, սակայն հիմնական «աստղային» դպրոց չկա: Այստեղ
կա երեք հիմնական կարգ: Առաջին կարգը համապատասխանում է չորս
աստղին, երկրորդ կարգը՝ երեք աստղին, երրորդ կարգը՝ երկու աստղին: Բացի այդ իտալական հյուրանոցները փոքր են՝ 50-80 համար, և որպես կանոն, փոքր հյուրանոցները չեն ձգտում բարձր կարգերի հասնել:

Հյուրանոցում հաճախորդների սպասարկման աշխատանքը սկսվում է հենց տեղերի ամրագրումից: Տեղերի ամրագրման ֆունկցիան իրականացնում է կա՛մ վերոհիշյալ ծառայության մենեջերը, կա՛մ էլ անմիջապես ընդունման ծառայությունը: Որպես կանոն, հյուրը կամ գործարարը, չցանկանալով հան- դիպել ամրագրման ընթացքում ծագող որևէ խնդրի, նախապես կապ է հաստա- տում վերոհիշյալ ծառայության հետ: Համարի ամրագրման ծառայության ֆունկցիաներն են.

● Պատվերի ընդունում և մշակում

● համապատասխան փաստաթղթերի լրացում և ստորագրում

● մուտքի և ելքի ամենօրյա գրաֆիկի ստեղծում:

Տեղերի ամրագրման պատվերը կարելի է կատարել հեռախոսով, ֆաքսով, փոստով, ինտերնետի օգնությամբ և անձամբ: Յուրաքանչյուր պատվեր պետք է պարունակի հետևյալ ինֆորմացիան.

● Այցելության օրը և ժամը

● մեկնելու մոտավոր օրը և ժամը

● այցելուների թիվը

● համարի կարգը (լյուքս, ապարտ, էկոնոմ, բիզնես կլաս)

● համարի ծառայությունները(լոգարան, սառնարան, չհրկիզվող պահարան, հեռուստացույց)

● սննդի ծառայությունները (միայն նախաճաշ, ճաշ կամ ընթրիք)

● գինը

● այն մարդու անունն ու ազգանունը, ով պետք է վճարի (կամ կազմակերպության անվանումը)

● վճարման ձևը (կանխիկ, փոխանցումով, կրեդիտ քարտով)

● լրացուցիչ ծառայություններ

Բացի վերոհիշյալից՝ պատվիրատուն պետք է թողնի իր կոորդինատները` հասցեն, հեռախոսահամարը, ֆաքսը , հաշվեհամարը և այլն: Պատվերն ուսումնասիրելուց հետո, եթե այն հնարավոր է իրականացնել, հյուրանոցը հաստատում է պատվերը և տեղյակ պահում պատվիրատուին, հակառակ դեպքում մերժում է: Եթե պատվերը հաստատվել է, ապա հյուրանոցը պարտավորվում է պատվիրատուին տրամադրել այն բոլոր ծառայությունները, որոնք նշվել են նախնական պատվիրման փուլում: Հաստատումը ուղարկվում է գրավոր ձևով, որպեսզի ներկայանալու ժամանակ հաճախորդը այն ներկայացնի: Յուրաքանչյուր պատվերի ընդունում կամ մերժում գրանցվում է հատուկ կարգով: Եթե պատվերի մերժումը ժամանակին չի գրանցվում (երբ պատվիրատուն պատվերը մերժում է), ապա այնպես կարող է լինել, որ համարը մնա չվաճառված: Եթե համարը մնում է չվաճառված, ազատ, ապա բնականաբար հյուրանոցի ցանկալի եկամուտը նվազում է: Շատ երկրներում ընդունված է, որ ամրագրման ժամանակ պատվիրատուն իր ամրագրումը հաստատելու համար ինչ-որ գրավ թողնի, որպեսզի պատվերի ուշացման կամ չգալու դեպքում հյուրանոցը վնաս չկրի: Այդպիսի գրավը լինում է մատուցվող ծառայության 50 %-ի չափով։

Ընդունման, գրանցման և տեղավորման ծառայությունն իրականացնում է հյուրերի ընդունումը, գրանցումը, տեղավորումը:Ծառայության աշխատակիցների աշխատանքային պարտականություններից են.

1. Ազատ համարների հաշվառում, համարների տեսակավորում, հաշվի լրացում և վերջնահաշվարկի կազմում: Հաճախորդների գալուն պես ընդունման ծառայությունը ամրագրման ծառայությունից ստանում է այցելուի ներկայացրած պատվերը մշակված ձևով, ըստ որի աշխատակիցը բացում է հյուրի քարտ և տալիս համապատասխան համար:

2. Սենյակի բանալիների հանձնումը

Ընդունման ծառայության տարածքում գտնվում է սենյակների բանալիների համար նախատեսված պահարան:
Այստեղ բանալիները կախված են ըստ շարքերի, կարգերի, հարկերի:

3. Հաճախորդի անձնական քարտի բացում: Յուրաքանչյուր այցելուի հա-
մար նրա ժամանումից հետո բացվում է անձնական քարտ, որտեղ պահվում է
ինֆորմացիա նրա մասին, որից էլ օգտվում են հյուրանոցում ծառայություններ
մատուցողները: Եթե տվյալ անձը որոշ ժամանակ անց նորից է գալիս այդ հյուրանոց, աշխատակիցների աշխատանքն ավելի է հեշտանում, քանի որ նրանք ունեն այդ հաճախորդի մասին ողջ ինֆորմացիան։

Ընդունման ծառայության կարևոր փաստաթղթերից են.

● Անկետա (1-Г տեսակի)

● արտասահմանյան հյուրի գրանցման մատյան (2-Г տեսակի )

● հաշիվ (3-Г տեսակի )

● հաշիվ (3-Г ա տեսակի )

● հյուրի քարտ (4-Г տեսակի )

● դրամարկղային հաշվետվություն (5-Г տեսակի)

● ամրագրման և բնակեցման հաշիվ ` փոխանցումով (7-Г տեսակի )

● գումարի վերադարձման տեղեկանք (8-Г տեսակի)

● հյուրանոցի սեփականության վնասման ակտ (9-Г տեսակի )

● տեղերի ամրագրման փաստաթուղթ (10- Г տեսակի )

● ավտոկանգառ (11- Г տեսակի)

● տրամադրվող լրացուցիչ վճարովի ծառայությունների հաշիվ (12- Г տե- սակի)

● պահպանման համար հանձնված իրերի տեղեկանք (13- Г տեսակի)

Օտարերկրյա այցելուին սպասարկելու ժամանակ ադմինիստրատորը պետք է ստուգի նրա անձնագրի վավերականության ժամկետը, վիզայի կնիքի վրա գրի հյուրանոցի անունը, գրանցման օրը, գրանցման համարը և այս բոլոր կարևոր տվյալները գրանցի օտարերկրյա հաճախորդների համար նախատեսված գրանցամատյանում: Օտարերկրացին պարտավոր է անձնագիրը գրանցել տվյալ երկրի ոստիկանության անձնագրային բաժնում: Հիմնականում հյուրանոցն ինքն է զբաղվում իր հաճախորդին երկրում գրանցելու հարցերով։

Կոնֆլիկտը (լատիներեն conflictus-ընդհարում) երկու կամ մի քանի հոգու միջև համաձայնության բացակայությունն է: Յուրաքանչյուր կոնֆլիկտ ունի իր թե´ դրական, թե´ բացասական կողմերը` կախված տարբեր հանգամանքներից: Այնինչ, այն կարծիքն է ձևավորված, որ այն վատ, անախորժություններով լի, տհաճ երևույթ է, բայց եթե հաշվի առնենք, որ կոնֆլիկտը (թե միջանձնային, թե ներանձնային) նպաստում է ներքին պոռթկումների, լարվածության, ֆրուստրացիոն վիճակների արտամղմանը, բացասական ապրումների դուրս թափմանը, ապա հասկանալի է նաև կոնֆլիկտի դրական կողմը, որը նպաստում է հոգեկան կոմֆորտ վիճակի առաջացմանը և ներքին հանգստությանը:

Բացի այդ, հաճախ կոնֆլիկտները նպաստում են դրական հարաբերությունների ստեղծմանը, վատ հարաբերությունների լավացմանը, քանի որ շատ հաճախ հենց բանակցությունների, քննարկումների ու վիճաբանությունների արդյունքում են առաջանում բարիդրացիական հարաբերություններ: Ուստի, կոնֆլիկտը երբեմն օգտակար կարող է լինել. չպետք է միշտ խուսափել դրանից, այլ պետք է առաջացած կոնֆլիկտը ճիշտ հանգուցալուծել: Դրա համար անհրաժեշտ է հաշվի առնել բոլոր հանգամանքները սեռային, տարիքային, կրթական: Ելնելով դրանցից պետք է հակամարտող կողմերը կարողանան ճիշտ հասկանալ միմյանց, առողջ փոխզիջման գնան: Դա հաճախ պահանջում է մեծ ջանքեր, վարպետություն, խելամտություն ու ճկունություն, իսկ դրանց բացակայության դեպքում հաճախ կոնֆլիկտը ավելի սուր
ընթացք է ստանում:

Կոնֆլիկտային իրավիճակներ հյուրանոցներում հաճախ են լինում: Հյուրանոցային սպասարկման հոգեբանության մեջ կա <<բարդ հաճախորդ>> հասկացությունը,ինչից էլ սկիզբ են առնում բոլոր կոնֆլիկտային իրավիճակները: Կոնֆլիկտային իրավիճակները կարող են ծագել նույնիսկ մանր պրոբլեմներից, և հստակ հնարավոր չէ ասել, թե կոնկրետ ով է մեղավորը` հաճախո՞րդը, թե՞ աշխատակիցը: Երբեմն հյուրանոցի անձնակազմը դառնում է հաճախորդի ագրեսիվ վերաբերմունքի զոհ: Այդ ագրեսիան երբեմն անձնակազմին մղում է պատասխան հարվածի, երբեմն էլ դարձնում նրան անզոր: Հիմնականում կոնֆլիկտները ծագում են սպասարկման մեջ տեղ գտած թերությունների պատճառով: Կոնֆլիկտները հարթելու համար անհրաժեշտ է բացահայտել և հասկանալ կոնֆլիկտի առաջացման պատճառը:

Կոնֆլիկտի առաջացման պատճառները տարբեր են` օբյեկտիվ և սուբյեկտիվ: Երկու դեպքում էլ անհրաժեշտ է վերացնել կոնֆլիկտածին գործոնը, սակայն սովորաբար օբյեկտիվ գործոնը վերացնելն ավելի հեշտ է, քան սուբյեկտիվ գործոնը, որը մեծապես կախված է հակամարտող կողմերի անձնային ուղղվածությունից և միմյանց նկատմամբ ունեցած վերաբերմունքից: Սուբյեկտիվ գործոնի մեջ են մտնում մարդկային տիպերը. ոմանք մտածում են, թե մեղավոր են բոլորը, բացի իրենցից. դա տիպիկ ագրեսորի կերպար է: Մյուսները ողջ մեղքը բարդում են իրենց վրա. սրանք էլ տիպիկ «զոհ» են: Երրորդներն էլ համարում են, որ կյանքն է այդպիսին՝ հաշտվելով իրավիճակի հետ: Սովորաբար կոնֆլիկտի ընթացքն այսպիսին է. «հերոսներից» մեկը հարձակվում է մյուսի վրա: Սա պահանջում է հակազդման երեք տարբերակներից մեկի ընտրություն. «պարտություն-հաղթանակ», «հաղթանակ-հաղթանակ», «պարտություն-պարտություն»՝ կախված նրանից, թե «ով ինչպես է դուրս գալիս իրավիճակից»: Եթե հնարավոր չէ լուծել կոնֆլիկտը, պետք է գոնե թուլացնել անձի հուզական լարվածությունը: Ինչպե՞ս հասնել դրան.

1. Անհրաժեշտ է չներփակվել սեփական վիճակի, մտքերի մեջ: Պետք է փորձել լավ տրամադրվել դիմացինի նկատմամբ, քեզ պատկերացնել նրա փոխարեն և փորձել զգալ այն, ինչ նա էր զգում այդ իրավիճակում:

2. Պետք է թույլ տալ, որ «ագրեսորը» արտահայտվի, և ուշադիր լսել նրա ասածը: Դա համեմատաբար կթուլացնի հակառակորդի լարվածությունը:

3. Ագրեսիվ հարձակման դեպքում լավագույն արդյունք կտա հակազդեցության հանկարծակիությունը: Անշուշտ, «ագրեսորը» սպասում է, որ դիմացինը կհարձակվի կամ կխուսափի: Մի´ արդարացրեք նրա հույսերը, նրա խոսքերը իրեն «վերադարձրե´ք»:

4. Զրույցը խաղաղ կանցնի, եթե դուք հայտնեք ձեր վրա նրա խոսքերի թողած ազդեցության մասին: Փորձեք ավելի հարգանքով ու մեծահոգաբար վերաբերվել նրան, և դրանով ավելի փափկացրեք նրա կռվարար հոգին. Թող նա իրեն մեղավոր զգա և ներողություն խնդրի:

5. Անհրաժեշտության դեպքում դիմե´ք փաստերին, քննարկումներին, պար- զաբանումներին, թու´յլ տվեք, որ դիմացինը խոսի և ճիշտ բացատրի իր քայլերը, հետո նոր հաստատե´ք ձեր տեսակետը:

6. Եթե իրավիճակը հեշտ լուծելի է, մի´ բարդացրեք, փորձե´ք առաջինը համերաշխության առաջարկ անել, ինչ-որ ընդհանուր բան գտեք նրա հետ, մի´ դիմեք վերադասին, եթե կարող եք ինքներդ լուծել այդ խնդիրը: Դրանով դուք նրան կհասկացնեք,որ ավելի բարեխիղճ ու ազնիվ մարդ եք, քան ինքը:

7. Փորձե´ք խաղարկել դիմացինի թույլ տեղերը (առանց վիրավորելու նրան), որը թույլ կտա սեփական սխալներին կողքից նայել:

8. Հումորը հուզական լարվածությունը թուլացնելու հիանալի միջոց է, բայց անհրաժեշտ է դրանից զգույշ օգտվել, քանի որ հաճախ անհաջող հումորն էլ կարող է դառնալ կրկնակի կոնֆլիկտի պատճառ:

Կոնֆլիկտների հարթման վերոհիշյալ ելքերը երբեմն կարող են վատ ազդեցություն ունենալ: Դրա համար անհրաժեշտ է, որ աշխատակիցը իր համար պարզի հաճախորդի հոգեբանական նկարագիրը և ըստ այդմ էլ փորձի ընդդիմանալ կոնֆլիկտային իրավիճակին: Եվ պետք է հիշել, որ հաճախորդը միշտ ճիշտ է։